ಶ್ರೀ ಗುರುರಾಯರ 916 ನೇ ಭಜನೆ

ಶ್ರೀ ಗುರುರಾಯರ 916 ನೇ ಭಜನೆ

ಇರುಳಲ್ಲಿ ಮರುಳಲ್ಲಿ ನಡೆಯುತ

ಸೋತು ಸುಣ್ಣಾಗಿರುವೆ ಪ್ರಭುವೆ

ಕೈಹಿಡಿದೆನ್ನ ಮುನ್ನಡೆಸುವ ತಂದೆ

ನೀ ಕಾಣದೆ ಬೆಂದು ಹೋಗಿರುವೆ.      |ಪ|

ಕಾಲಚಕ್ರದ ಸೆಳೆವಲಿ ಸಿಲುಕಿರುವ

ಬದುಕಿನ ಪರಿ ನೀನರಿಯೆಯೇನು

ಎನ್ನ ನರಳುವ ಬದುಕಿನ ನೋಟ

ನಿನ್ನ ಕಣ್ಣಿಗೆ ಪ್ರಭುವೆ ಕಾಣದೇನು.       |1|

ಒಮ್ಮೊಮ್ಮೆ ಮಿಂಚು ಗುಡುಗಿನಲಿ

ಬದುಕೇ ನಡುಗಿ ಹೋಗಿದೆಯಲ್ಲ

ಅದನೆದುರಿಸುವ ಧೈರ್ಯ ಸಾಲದೆ

ನಿನ್ನ ಮೊರೆಹೋದೆ ಪೊರೆವೆಯಲ್ಲ.     |2|

ಕೈಕಾಲು ಧೃಢತೆಯನೇ ಕಳೆದಂತೆ

ಎನ್ನ ಎದೆಯಲ್ಲಿ ನಡುಕ ಹುಟ್ಟಿಸಿದೆ

ನನ್ನೆದೆಯ ವೃಂದಾವನಕೆ ತಂದೆಯೆ

ನೀನು ಬರುವ ಹಾದಿಯನೇ ಕಾಯ್ದೆ.      |3|

ಒಂದೊಂದು ಕ್ಷಣದಲ್ಲಿ ತುಂಬಿರುವ

ನೋವಿನ ಪರಿಯನು ಸಹಿಸದಾದೆ

ಪ್ರಭು ರಾಘವೇಂದ್ರ ನಿನ್ನನು ಬಿಟ್ಟು

ಇನ್ನಾರನೂ ನಾನೀಗ ನಂಬದಾದೆ.         |4|

ರಚನೆ ಅಚ್ಯುತ ಕುಲಕರ್ಣಿ