ಮನದ ಮಾತು : 3
ಮನದ ಮಾತು : 3
ಬದುಕನ್ನು ದೂರದಿಂದ ನೋಡಿ
ಸುಖ ದುಃಖದಲೆಯ ಅನುಭವಿಸು
ಹತ್ತಿರ ಹೋಗಿ ಸಿಲುಕಿಕೊಂಡರೆ
ಬದುಕಿನ ಭಾರವನ್ನು ಎದುರಿಸು
ಶಾಂತಮನ ನೀ ಕಂಡುಕೊಂಡರೆ
ಎಲ್ಲರನ್ನೂ ಅರ್ಥಮಾಡಿಕೊಳ್ಳುವೆ
ಅಶಾಂತಮನ ನಿನ್ನದಾದರೆ ಸಾಕು
ಎಲ್ಲರಿಗೂ ಅಪರಿಚಿತನಾಗಿಬಿಡುವೆ
ಬರುವ ಒಳ್ಳೆಯ ದಿನಗಳ
ನೆನೆದು ಮುಂದೆ ಸಾಗುತಿರು
ಕೆಟ್ಟ ದಿನಗಳೂ ಹಾಗೆಯೇ
ಮಾಯ ನಿಶ್ಚಿತವೇ ನೋಡು
ದುಃಖದ ಕಾರ್ಮೋಡ ಎಷ್ಟೇ
ಆವರಿಸಲಿ ಹೆದರುವದೇತಕೆ
ಒಂದೆರಡು ಸುಖದ ಕಿರಣಗಳೂ
ಸಾಕು ಸುಂದರವಾದ ಜೀವನಕ್ಕೆ
ಸುಪ್ತಚೈತನ್ಯಗಳು ಕರೆದಿರಲು
ದೂರ ಓಡುವೆಯೇಕೆ ಮನವೆ
ಬದುಕು ನಿನ್ನನು ಇದರಿಂದ
ದೂರವಿರಿಸಿರುವದನು ಎಂದು ಅರಿವೆ
ಬದುಕಿನ ಝಳ ಅಂಟಿಕೊಂಡಷ್ಟೂ
ನಿನ್ನನು ಉರಿಸುವದು ನಿಶ್ಚಿತವೇ
ಸ್ವಲ್ಪ ಅಂತರ ಕಾಯ್ದುಕೊಂಡು
ನಡೆದರೆ ಸಾಕು ನಿನಗೆ ಸದಾ ಹಿತವೇ
ನೀ ಹೇಗೆ ಎಂಬ ಚಿತ್ರ ಎಲ್ಲರಲಿ
ಸದಾ ಮೂಡಿಕೊಂಡಿರುವದು
ಬದಲಿಸಲೆತ್ನಿಸಬೇಡ ಎಂದಿಗೂ
ಆತ್ಮಸಾಕ್ಷಿ ನಿನ್ನ ಜೊತೆಗಿರುವುದು
ಬದುಕಿನಲ್ಲಿ ನೀ ಕಂಡ ಕನಸನ್ನು
ಯಾರಿಗೆ ಏಕೆ ಹೇಳುವೆ ನೀನು
ಅದರ ಬಗೆಗೆ ನಿನಗಿರುವ ಮಹತ್ವ
ಅವರರಿವಿಗೆ ಬರಲು ಸಾಧ್ಯವೇನು
ಮಗುವಿನಂಥ ಮುಗ್ಧತೆಯು
ಸದಾಕಾಲ ಇದ್ದರೆ ಅದೆಷ್ಟು ಚೆನ್ನ
ಸುತ್ತಲ ಜಗವು ಹೇಗಿದ್ದರೂ
ಚೆನ್ನಾಗಿಯೇ ಗ್ರಹಿಸುವದು ಮನ
ನೀ ಮೂಡಿಸುವ ಬದುಕಿನ ಚಿತ್ರ
ಸುಂದರವಾಗಬಯಸುವದು ಸಹಜ
ವಿಧಿಯಾಟವೇನಿದ್ದರೂ ಹೆದರದೆ
ನೀಡು ನಿನ್ನಿಚ್ಛೆಯ ಬಣ್ಣಗಳ ತೇಜ
ರಚನೆ ಅಚ್ಯುತ ಕುಲಕರ್ಣಿ
Comments
Post a Comment