ವಿಷ್ಣು ಅಷ್ಟೋತ್ತರ: ಓಂ ಕೇಶವಾಯ ನಮಃ

ವಿಷ್ಣು ಅಷ್ಟೋತ್ತರ: ಓಂ ಕೇಶವಾಯ ನಮಃ

ಕೇಶವ ಹೆಸರಿಗೆ ವಿವಿಧ ಅರ್ಥಗಳಿವೆ. ಈ ಭಕ್ತಿರಚನೆ ಕೆಲ ಅರ್ಥಗಳನ್ನು ಒಳಗೊಂಡಿದೆ. ಉದ್ದ ಕೇಶವನ್ನುಳ್ಳ, ರಾಧೆಗೆ ಜಡೆಹಾಕುವ, ಶಿವ ಬ್ರಹ್ಮನ ಅಂಶವಿರುವ ಕೇಶಿ ರಾಕ್ಸಸನನ್ನು ಕೊಂದವನೆ ಕೇಶವ

ಜಗದ ಒಡೆಯ ಹೇ ಕೇಶವ

ವಂದನೆ ಸ್ವೀಕರಿಸು ಪ್ರಭುವೆ

ಬದುಕಿನ ಆಟವ ಸಲೀಸಾಗಿ

ದಾಟಿಸಲು ನೀನೇ ಬಾಧ್ಯವೆ.      |ಪ|

ಸುಂದರ ಮುಖದ ಕೇಶವನೆ

ಉದ್ದ ಕೂದಲು ಶೋಭಿಸಿದೆ

ರಾಧೆಗೆ ನೀ ಹೆಣೆದಂಥ ಕೇಶ

ನಿನ್ನ ಪ್ರೀತಿ ರೂಪವ ತಿಳಿಸಿದೆ.      |1|

ಬ್ರಹ್ಮ ಶಿವನ ಅಂಶ ಹೊಂದಿ

ದೇವರ ಏಕಸ್ವರೂಪ ಹೇಳಿದೆ

ಜಗದ ರಕ್ಷಣೆಯ ಭಾರವನ್ನು

ಎತ್ತುತ ಜಗದೊದ್ಧಾರಕನಾದೆ.      |2|

ಜಗಕೆ ಬೆಳಕನು ಕೊಡುವಂಥ

ಸೂರ್ಯನಿಗೂ ನಿನ್ನ ಕೃಪೆಯು

ಬೆಳಕು ಮತ್ತು ಶಾಖ ನೀಡುತ

ಕೊಟ್ಟೆ ಪ್ರಜ್ವಲಿಸುವ ರೂಪವು.     |3|

ಮತ್ತೆ ಮತ್ತೆ ಈ ಜಗಕೆ ಬರುತ

ಭಕ್ತರ ಉದ್ಧಾರವ ಮಾಡಿದವ

ಕೇಶಿ ರಾಕ್ಷಸನನ್ನು ಸಂಹರಿಸುತ

ಸೃಷ್ಟಿಗೆ ರಕ್ಷಣೆಯನು ಕೊಟ್ಟವ.      |4|

ರಚನೆ ಅಚ್ಯುತ ಕುಲಕರ್ಣಿ